नेपाली पो हुँ त म

अरुले मोड आएपछि गति कम गर्लान्
अँह, म त झन बढाउँछु
त्यो अगाडीको बाइक, स्कुटर र कारलाई बायाँबाट जो उछिन्नु छ
हट्ने हैन डटी लड्ने नेपाली पो हुँ त म /

दोबाटो, चौबाटोमा दायाँ-बायाँ जान अरुले साइड-लाइट बाल्लान्
अहँ, म त बाल्दिन, ज्यान गए बाल्दिन
यो बाटो मेरो आँगन त हो नि !!!
जता सुकै जाउँ,
शिर उचाली चल्ने नेपाली पो हुँ त म /

अगाडीको बाइक/गाडीले बत्ति झिप-झिप गरेर पास मागोस्
अँह, म त हाइ बिम मै राख्छु
म झुक्दै नझुक्ने नेपालीको छोरो पो हुँ
बुद्धको ज्योति छर्ने नेपाली पो हुँ त म /

जेब्रा क्रशिंगमा मान्छे देख्ने बित्तिकै
कार / बाइकको गति बढाउने नेपाली पो हुँ त म
रेड लाइटमा भ्रूम भूरुम गर्दै टेक-अफ गर्ने
ग्रयान प्रीको प्रत्यासी पो हुँ त म
जाग्ने, चम्कने, लम्कने नेपाली पो हुँ त म //